Sapa makai chabi, iya ngasaika pedas, ku Entulu

 

by Chris Bishop. Posted on April 14, 2012, Saturday

SAPA MAKAI CHABI, DEKA NGASAIKA PEDAS: Entulu (duduk tiga ari kiba) bejaku ngagai pengarang berita sepengudah tembu Aum PRS seraya didinga kaban parti ke bukai.

Nama sida ti deka ngelabuhka Salang udah dianjung ngagai ketuai Barisan Nasional nengeri

KUCHING: Sapit Presiden Parti Rakyat Sarawak (PRS) Datuk Joseph Entulu Belaun sekali agi ngelalau raban ketuai renggat tinggi serakup Barisan Nasional (BN) nengeri meratika ulah sekeda raban BN ke deka ngelabuh (sabotaj) sitak Parlimen Julau.

“Ulah ke baka tu enda patut nyadi dalam serakup BN nengeri. Kitai enda tau nuchuk kaban diri ari belakang. Ulah tu chukup jai lalu PRS enda ngelakka pekara tu nyadi.

Pekara tu dipeda chukup serius lalu udah nyadi ba Julau alai sida iya ngembuan juluk deka ngelabuhka pemangku sitak nya Datuk Joseph Salang Gandum, tandu iya.

Iya mansutka jaku tu ba siti aum pengarang berita sepengudah ngulu Aum Supreme Kunsil PRS ke diatur ba indu opis parti nya ditu, kemari.

Seraya ke madah pekara tu udah dikenataika ngagai ketuai renggat tinggi BN, Entulu ke mega Sapit Menteri Pemansang Menua Pesisir enggau Kandang Nengeri Malaysia madah ulah ke baka nya tau ngujungka sitak parlimen Julau dikuasa raban penyakal.

“Pekara tu udah dikenataika ngagai ketuai renggat tinggi BN nengeri lalu kami arapka isu tu ditasat sereta ditagang enggau lengkas.

“Nama raban ketuai serakup BN ke ngembuan ulah nya udah dianjung ngagai ketuai BN nengeri. Aku enggai mansutka nama sida iya ditu tang sapa ke makai chabi, iya meh deka ngasaika pedas,”ku iya.

Nitihka penerang ke diterima PRS, sekeda raban ketuai BN nengeri Sarawak bisi ditemu ngembuan ulah bekimpin bejaika Salang enggau tuju deka ngelabuhka iya.

Presiden PRS Tan Sri James Masing kemari madah, penuduk PRS ba sitak Parlimen Julau dikeruga raban dalam serakup BN lalu tu siti ulah ke enda patut nyadi dalam BN.

Salang seiku Mandal Presiden PRS alai parti nya udah diungkupka enam penuduk parlimen.

Lima penuduk bukai ke dikuasa PRS iya nya Sri Aman, Lubuk Antu, Kanowit, Hulu Rejang enggau Selangau.

Entulu ke mega Kaban Parlimen Selangau madahka sitak iya (Selangau) dipelaba ka deka diperebut tiga iku chalun ba pengawa bepilih ke deka datai.

“Aku nyadang sitak Selangau deka diperebut tiga iku chalun lalu BN (aku) udah nyikap diri napi pengawa nya.

“Mayuh agi chalun bediri berebutka sitak nya. . .manah agi ,”ku iya.