PRU13: Baram dipelaba belaban lima sukut

 

Posted on April 14, 2012, Saturday

MARUDI: Sitak Parlimen Baram ke umbas iya pemesai dipelabaka dipelaban antara empat enggau lima iku chalun (sukut) lebuh ba pengawa bepilih besai ke- 13 tu ila .

Bedau lama tu tadi, bisi siti pesan jaku pandak (SMS) datai ari chalun ngatika diri ke udah alah lebuh ba pengawa bepilih Kunsil Nengeri (DUN) Sarawak kena bulan April 2011 suba ke ngena lambang ‘Bilun Boeing’ iya nya Michael Ding Tuah, peranak bansa Kiput, asal ari Kuala Tutoh madah ke penemu diri deka nguji baru bediri minta pilih, beduduk ari ansak raban penyukung iya empai lama tu tadi taja pan empai temu ni bagi parti penyakal ke deka diarika iya

Naka kediatu, Parlimen Baram dipangku Mandal Presiden Parti Progresif Demokratik Sarawak (SPDP) ke lalu nya Sapit Menteri Dagang Antarabansa enggau Industri Dato Jacob Dungau Sagan.

Lebuh ba pengawa bepilih besai nengeri kena bulan April 2011 tu tadi , Tuah mina teulihka 122 undi iya bediri ba sitak Marudi. Chalun ke bukai ke alah mega iya nya Edwin Dundang Bugak ari Parti Bansa Sarawak (SNAP) semina bulih 281 undi enggau Gerang ak Dagom ari Parti Keadilan (PKR) teulihka 1,376 undi, lalu Datuk Sylvester Entri ari SPDP bulih 4,578 undi lalu undi lebih 3,202 undi.

Kelimpah ari nya mega, bisi berita madah ke seiku luyar bebangsa Kenyah ari Long Jeeh, Ulu Baram, Roland Engan mega udah dipeda kiruh bebai ke lambang enggau menira PKR ba sebelah pasar Marudi enggau ba sebelah rumah panjai Iban seraya bebaika ‘Bup Jingga’ sida aja. Kena sida bekimpin.

Kelimpah ari Roland Enggau, berita mega bisi madahka seiku ari Kaban Komiti Parti rakyat Sarawak (PRS) ke dulu suba Patrick Sibat Sujang mega bisi naruh ati deka bediri tang bedau temu parti ke diarika iya laban bedau ngaga penerang ke diri empu.

Sibat mega kala bediri minta pilih ari Parti Bansa Dayak Sarawak (PBDS) suba tang alah laban niang Datuk Edward Jeli Belayong.

Tang anggul parti SNAP mega bisi deka nganjung chalun bediri ba sitak Baram, nya tau nyadi belaban lima sukut. Nitihka berita selebubu, enti amat mayuh chalun belaban, senang amat Barisan Nasional (BN) menang ba pengawa bepilih tu.

Berita madahka pengawa Jacob agi diguna rayat Baram lalu enti sema diganti enggau orang bukai, BN menang pan Tekat Ai Baram sigi agi nyadika jaku tauka isu raban penyakal.