Monday 16 April 2012

George Lagong deka ngulu forum ‘Who is the boss’

Posted on April 14, 2012, Saturday


KUCHING: Sebengkah forum ‘Who is the boss’ ke diatur Parti Keadilan Rakyat (PKR) pagila (15 April) deka digulu Kaban Kunsil Nengeri (ADUN) Pelagus George Lagong ke nyadi seiku ari speaker.
Lagong, ke suah dipeda bebaik enggau Barisan Nasional (BN), meri kenyit udah pekara ke silik senentang forum nya dipadah ba aum media ba opis PKR Stampin ditu, kemari.
Lebuh dikerandau, Lagong madahka diri kena kangau ngulu forum ari raban pengatur forum .Iya enda madahka kebuah nerima kangau lebuh ke dikerandau.
“Nama kebuah aku ngulu forum ? Hari Minggu ila, bisi aku nyebut,” ku iya.
Pelagus, sitak mayuh diuan bansa Iban endur Lagong bediri ngatika diri menang nengah 2,837 undi. Iya teulihka 5,740 undi ngalahka chalun BN Stanley Nyitar @ Unja Malang ke bulih 2,903. Chalun PKR Edward Sumbang Asun bulih 1,171 undi.
Berebak enggau nya, lebuh ke ditanya sekalika iya deka bediri ba sitak Hulu Rajang ba pengawa bepilih tu ila, Lagong madahka empai maya besebutka pekara nya dulu.
Lagong, ketegal kaul enggau orang dagang – politik enggau apai Larry iya nya Dato Sng Chee Hua, udah dikaitka enggau sebengkah parti politik ke baru iya nya Parti Pekerja Sarawak(SWP) ke merambu deka bediri ba enda kurang ari empat bengkah sitak ke dipegai PRS nyengkaum sitak Hulu Rajang.
Forum ‘Who is the boss’ diatur berindik ari timbal jaku ‘Jangan Lawan Tauke’ (Don’t Fight The Boss) ke dipansut Menteri Kanan ke lalu nyadi Presiden Parti Rakyat Sarawak (PRS) Tan Sri Dr James Jemut Masing bulan nyin kemari.
Masing enda ngulu forum nya lebuh ke dikangau PKR Stampin nyadi seiku ari speaker, madahka iya bisi pekara ke besai agi deka diintu.
Forum nya, diperambu diatur berengkah ari pukul 2 ngalih hari nyentuk ke pukul 5 lemai, deka dipenyadika Ketuai Indu Nasional PKR ti mega Kaban Parlimen (MP) Ampang Zuraida Kamaruddin.
Speaker ke bukai nya Sapit Chairman PKR Sarawak See Chee How enggau Saintis Politik ari Unimas Dr Andrew Aeria.
Forum nya deka beseruanka seiku luyar enggau seiku aktivis Ann Teo Chiang Joo.

No comments:

Post a Comment