SPDP nerima pom masuk raban baru

Posted on January 28, 2012, Saturday

RABAN BARU: Mawan (kiba dua ) nerima pom masuk parti ari Wong 

(kanan empat) seraya diperatika Paul (kiba) enggau raban bukai.

Semua pampang diansak chakah bejalaika pengawa matak orang nyadi raban ba kandang menua sida empu, ku Mawan

SARIKEI : Bekenangka ba pekara parti mit tauka besai dalam gempung Barisan National (BN) aruh enda nyadika buah jaku laban genap raban begunaka sukung enggau kerejasama semua raban kelebih agi maya betapi enggau raban penyakal ba pengawa bepilih besai (PRU-13) tu ila.

Bisi sekeda parti komponen diagihka mayuh agi penuduk dalam Barisan Nasional (BN) ari parti bukai ba pengawa bepilih, tang nya ukai reti bisi parti komponen diteju betapi kediri aja ba sitak sida empu, ku  Presiden Parti Demokratik Progresif Sarawak (SPDP) Tan Sri William Mawan Ikom. “Enti betatika gaya politik ke diatu, nadai sebuah parti komponen BN tau dikumbai kitai mit tauka besai. Ba aku, chukup semua parti komponen BN berakup ba siti entiti ke tegap,” ku iya bejaku  ba pengerami Taun Baru China diatur SPDP pampang Repok ba sebuah restoren ditu lemai Hari Empat tu tadi.

Betatika parti penyakal udah ngayanka pemendar gempung sida deka ngerampas kuasa, parti BN aruh numpu perati sida enggau segala peneguh nyikap diri besaup enggau pangan diri dikena matahka pemar ari ti ngambung pengering parti diri, ku semetak jaku iya, pemenang chalun BN ba ni bagi sitak nya pemenang ungkup semua parti komponen BN. “BN enda ulih terenah duduk bekenangka pemujur ke udah dikeulih laban gaya politik maya diatu jauh bebida enggau ke udah laban diatu mayuh bendar peneka ke dikeingin lalu ubah paradigma ba runding enggau timpai mensia lebih agi ngagai sida rebak baru,” ku iya .

Berindik enggau tu iya beseru ngagai raban SPDP ngambika nyikap diri betapi enggau ubah senipak enggau peminta enggau pemar jeman ke diatu.  Kitai bela nemu BN aruh meruan tegap, Mawan madahka SPDP ti nyadika sebuah parti komponen deka bejalaika pengawa negapka raban di genap pelilih.

Iya ngansak semua pampang chakah agi matak orang nyadi raban ba kandang menua sida empu. “Nguji jengkau semua pengundi ke duduk atas pagar masuk parti lalu sama enggau ngambi bagi ba politik pemansang ke ditebah perintah BN. Enggau masuk parti orang mayuh ulih ngambi bagi sechara regas ba politik ngambika ngemuntangka perintah BN bejalaika program pemansang,” ku iya.

Ba pengerami nya mega Mawan bisi nerima lebih ari 400 iti pom raban baru ungkup pampang Repok ari raban komiti , Wong Siew Huo ti mega nyadi chairman pengatur.

Sekeda ke bisi datai ngulu pengerami nya Sekretari Pampang SPDP Repok, Lau yuk Ping, Sekretari Politik Kepala Menteri, Paul Igai enggau raban Komiti Tetinggi SPDP.