Posted on January 25, 2012, Wednesday
HUTAN MELINTANG: Perintah Barisan Nasional (BN) kenyau ari megai menua pengudah merdeka seruran ngamatka semaya mantu rayat ngelempungka pemerat belanja ti majak niki.
Kelimpah ari nya, Menteri Pengetan Menua ti mega Naib Presiden Umno, Datuk Seri Ahmad Zahid Hamidi madah, bantu baka BR1M dikena meri peluang ngagai ruang bilik seranta ngemajuka diri.
Iya nyakal sekeda penemu orang ti madahka perintah BN bebendar mantu rayat enti nyau deka semak maya pengawa bepilih nyengkaum numbuhka skim BR1M dikena narit sukung.
“Tang ke bendar perintah nadai ngetu mantu rayat ti kurang penatai pemisi sekalika sebedau tauka sepengudah pengawa bepilih,” ku iya bejaku ngagai pemberita sepenembu pengawa nyuaka baucher BR1M ke penyampau RM500,000 ngagai 1,000 iku rayat ba sitak Kunsil Nengeri Hutan Melintang, ba Wisma Umbo pelilih menua Bagan Datoh, ditu.
“Rayat patut beterima kasih ngagai Menteri Besai, Datu Seri Najib Tun Razak ti mantaika buah runding deka mantu rayat ke seranta enggau nadai bechiping lebih agi ba menua pesisir,” ku iya.
Naka ke diatu sepanyampau 4,000 iku rayat ba sitak Parlimen Bagan Datoh udah nerima baucher BR1M ti sepenyampau RM2 juta ari perintah.
Urung 6,000 rayat ba sitak Parlimen ke sama dipilih nerima baucer BR1M enggau sepenyampau Rm3 juta pengudah peminta sida dikemendarka Opis Pengumpul Chukai Nengeri (LHDN), sepenembu diproses.
Ahmad Zahid madah, perintah BN deka terus mantu rayat pansut ari penyeranta enti diberi awak ngiring menua. —Bernama
No comments:
Post a Comment