Posted on January 25, 2012, Wednesday
MIRI: Perintah Barisan Nasional ulih menang ba pengawa bepilih besai (PRU-13) taja pen betapi enggau pengering raban penyakal .
Menteri Teknologi Gadung enggau Ai Datuk Seri Peter Chin Fah Kui madah , BN bisi bendar pengarap ba raban pengundi deka melakang penyakal lebuh pengawa bepilih parlimen laban rikut ngayanka perintah udah bejalaika pengawa ke manah ungkup rayat.
“Ba runding aku mayuh agi pengundi deka meri penentu ke manah ungkup jemah ila lalu tu ulih meri pemujur ngagi BN , “ ku Chin bejaku ba rumah tebuka Taun Baru China ba rumah iya di Luak Bay, Miri pagi kemari .
Chin bisi ditanya bekaul enggau pemar ditapi perintah BN dalam taun 2012, iya nya taun Naga Ai .
Nitih ku Chin, pengawa bepilih deka dipenyadika taun tu enggau nya tuai-tuai dalam BN bekenanas gawa seraya ti arap bendar ulih nambat ati mensia mayuh.
Ku iya, rikut BN udah mujur mai pemujur seraya ulih ngempung mensia mayuh.
Ba kerusi Parlimen Miri, ti enggi Chin diatu, iya madah endang enda bula bisi pemar.
Iya madahka, BN udah lenyau dua buah kerusi sitak kunsil nengeri , Piasau enggau Pujut tang menang ba Senadin ba pengawa bepilih nengeri tu tadi .
Bekenangka hal penyemun ekonomi dunya , ku iya, perintah di baruh Menteri Besai Datuk Seri Najib Tun Razak deka begigaka chara negapka ekonomi menua nengah mayuh bengkah strategi.
No comments:
Post a Comment