PTRS minta perunding elawin TR ditiki

Posted on February 4, 2012, Saturday

 

SIBU: Gerempung Tuai Rumah Sibu (PTRS) minta perintah nambahka penyampau elawin ti diterima raban Tuai Rumah (TR), baka ti udah dipadahka sebedau tu.

Chairman PTRS, Kunsilor TR Linus Melin Lembang madah, ninting baum mayuh TR enggau kaban gerempung bukai nanya pekara nya.

“Aku ngarika Tuai Rumah bukai sereta kaban PTRS minta perintah berunding enggau jampat pasal penambah elaun tu,” ku iya madah ngagai pengarang berita kemari.

Linus madah lebih setaun sida nganti berita manah nya tang nyentukka saritu berita manah nya empai mega didinga.

Tuai Rumah ke udah dikemendarka perintah nerima elaun RM450 sebulan lalu tu reti iya mayuh TR idup ba baruh tikas penyeranta.

Ku iya, laban pengawa bepilih nyau majak semak, sida ngarapka isu elawin bala TR tu ulih diputarka enggau lengkas.

“Elawin RM450 sebulan enda chukup kelebih agi ba sida Tuai Rumah ke nadai penatai pemisi bukai.

“Elawin ti tinggi tau meransang bala TR ngambika gawa enggau bebendar agi,” ku Linus ke mega madah pengawaTR amat beguna laban sida nyadika jematan entara nembiak ke diau ba rumah panjai enggau perintah.

Iya mega ngelalau bala TR ke udah tuai kelebih agi sida ke beumur lebih ari 70 taun ngambika nyurut diri lalu ngetu nyadi TR.

“Pia mega enggau TR ke enda gerai tauka enda nemu macha enggau nulis, sida mega aruh meri peluang ngagai rebak baru ti biak ngambika tau ngesan pengawa berat nya,” ku iya.

Penyanding penemu PTRS Pengulu James Semilan madah PTRS deka meri sukung ngagai Pemancha baru menua Sibu, Stanley Geramong Bandar.

“Kami deka majak gawa begulai lalu meri sukung ngagai iya ngambika ngeringka agi adat sereta main asal kitai,” ku iya ke mega madah Stanley mangku pengawa Sekretari PTRS.

James madah Stanley agi nyadi kaban PTRS laban atur gerempung ngemendarka tuai raban bansa baka Temenggong, Pemancha enggau Pengulu tau nyadi kaban sereta mangku pengawa dalam PTRS.

Ubah atur PTRS udah dikemendarka Opis Pengerejista Gerempung (ROS) kena 18 November suba ti mega bisi ubah pasal tuai rumah ke bedau nerima surat padu perintah, tau ngundi sereta megai pengawa dalam gerempung.