Seru PRU-13 udah majak disepi

Posted on February 21, 2012, Tuesday

KUCHING: Pengekum pengawa bepilih besai ti ke-13 (PRU13) majak dia­sai taja pen Menteri Besai (PM) Datuk Seri Mohd Najib Tun Razak enda muka mulut senentang maya pengawa nya deka diatur.

Macham cherita bisi didin­ga diatu ba pengawa perintah Barisan Nasional (BN) napi satup raban parti penyakal maya nya ila.

Berindik ari nya, sebedau sukung majak kurang sereta dialahka raban penyakal, injin BN ke nyerangkum genap parti dalam serakup BN dilalau terus ngenegapka penyerakup.

Entara ketuai ke dulu ngeringka penegap BN iya nya Kepala Sekretari Politik Kepala Menteri Abdul Ka­rim Rahman Hamzah.

Karim enda nyangkal sereta pechaya, PRU13 engka deka diatur ambis tumu bulan May lalu nge­lalau raban parti ke dalam serakup BN lebih agi ke benung napi penyarut dalam parti ngelengkaka dulu laya sida nya.

“Lengka dulu laya kita nya enda lama lalu nyikap diri napi bintis munsuh kitai ngelamatu,” ku iya lebuh dirandau Utusan Borneo kemari.

“Nadai reti kitai belaya sama diri laban pengawa nya deka ngujungka kitai alah sereta ngemunaska semua pemujur ke udah diasaika ngelamatu,” ku iya..

“Angkat kitai begempung lalu tapi sapa aja munsuh ke deka ngelaban, tandu iya.

Ba pengawa PRU12, Ba­risan Nasional teulihka pemujur merintah menua sepengudah menang ba 140 penuduk parlimen ari pen­yampau 222 ke diperebut.

Sarawak maya PRU12 nya menang 30 ari 31 penuduk parlimen lalu semina alah laban DAP ba penuduk Par­limen Bandar Kuching.

Tang, ba pengawa bepilih mit parlimen Sibu ke diatur sepengudah pemangku sitak nya lebang (nadai), BN alah sigi agi penuduk ba chalun DAP Wong Hong Leng.