Dayak patut besaup: Mauh

by Judan Bungap. Posted on February 13, 2012, Monday

Taja pen kitai dibida nengah macham bengkah penemu politik tang aruh ngangkatka bansa diri nengah SDNU

 SIBU: Raban Dayak ti ngembuan penemu politik bebida dilalau ngambika enda nyarut Gerempung Bansa Dayak Sarawak (SDNU) tang aruh besaup ngemujurka gerempung nya.

Kaban Kunsil Nengeri (ADUN) Tamin Joseph Mauh Ikeh madah taja pen diatu raban Dayak datai ari mayuh bengkah penemu politik tang sida enda tau changka enggau pangan diri ba atur ngangkatka pemansang bansa Dayak.

“Taja kitai tu enda sebaka penemu politik baik nya ari parti perintah tauka penyakal tang kitai patut besaup ngangkatka bansa kitai. Enda nyadika penanggul enti nuan datai ari pengarap politik ti bebida tang ba SDNU kita meseti seperabung.

“Enti ukai kitai Dayak sapa agi dikeandal nyaga SDNU ti endang udah ditumbuhka bepuluh-puluh taun tu udah. Lakka politik nyadika lumur dua lalu kemeratka pemansang kitai Dayak,” pia ku iya.

Iya mantaika jaku nya maya bejadika Pengerami Angkat Sumpah SDNU Pampang Sibu Jaya bagi timpuh 2012-2013 ba sebengkah hotel tebilang ditu, malam kilah ensanus.

Nandu jaku iya baru, Mauh ngarapka raban SDNU ulih ngetanka kaul entara sida nyentukka ila.

“SDNU nyeraka penyerakup kita. Gerempung tu ngembuan tanggung pengawa numbuhka penyerakup bansa Dayak lalu nyantilka kaul enggau bansa bukai,” ku iya sambil madah gerempung tu nyadika platform numbuhka penyerakup bansa tang tau pambar enti politik dibai ngagai pejalai enggau pengelikun gerempung.

Ku iya, gerempung Dayak ke udah bisi maya hari tu bela ngembuan tanggung pengawa ti sebaka lalu badas agi enti gerempung tu majak ditumbuhka agi mantu nyaguka agi pengidup bansa Dayak.

“Mayuh agi gerempung Dayak, kuat agi bansa kitai. Runding kitai dulu agi dipendingka orang enti kitai bela beserakup enggau pangan diri,” ku iya nerangka.

Mauh madah SDNU engkeman bendar ngembing pemansang ekonomi, pelajar, dayaidup enggau mayuh pekara bukai.

Nya alai, iya ngansak bala Dayak bekunda ngulihka pelajar kelimpah ari nerenakka runding deka ngangkatka penatai pemisi diri ngambika enda tinggal singakng ari orang bukai.

“Ukai semina nya aja, kitai mega meseti landik bekenaka awak ti endang udah nyengala ba mua alai ngidupka diri ba dunya maya hari tu,” pia ku iya nambah.

Beserimbai enggau pengerami tu mega, Mauh ngerahka bantu RM5,000 ngagai SDNU Pampang Sibu Jaya dikena nyaup bejalaika progrem gerempung nya.

SDNU Pampang Sibu Jaya 2012-2013 betuaika Steven Rom lalu dibantu Danggang Ugik (mandal) enggau Hilary Tikok nyadi seketari.

Joseph Selima dipadu nyadi sapit seketari, Lasum Kanawang (tukang wang) enggau Duli Abas (sapit tukang wang).

Komiti SDNU Pampang Sibu Jata serak tu iya nya Kenneth Lone, Salang Kara, Harry Kiroh Rayon, Muking Amut, Ngelai Jembon, Aying dan Henre Banye.

Bela bisi datai maya tu iya nya Seketari Politik Kepala Menteri, Tengku Geruna, Chairman SDNU Sibu Jaya Steven Rom, Chairman SDNU Pampang Rajang Mejar Moses Ripai, Chairman SDNU Pampang Sibu Chambai Lindong, Pemesai Rela Pelilh Sibu Leftenan Kolonel (B) Moses Sipan enggau Pengulu Enyang Menchol.