Anang bebagi ati nyukung BN

Posted on February 21, 2012, Tuesday

Seraya ke madahka diri meruan gagit bejalaika pengawa, iya ngelaluka saup rayat enti diberi awak ngetanka sitak nya

 

 UNGKUP NUAN: Salang (kiba) nerima tepa ari TR Barak (dua kanan) maya pengawa nya, ditu kemari.

SARIKEI: MP Julau, Datuk Joseph Salang Gandum ngansak rayat ba sitak P.209 Julau enda bebagi ati nyukung perintah Barisan Nasional (BN).

Enggau nya, pengundi di Julau aruh meri sukung ngagai chalun enda ngira ba sitak kunsil nengeri tauka parlimen, ku Salang lebuh bejaku ba pengerami Tuai Begulai enggau Rayat ba Rumah Barak Gadom di Nyalak Ili, Pakan semak ditu malam Hari Enam tu tadi.

Raban semua parti komponen enda tau enda bekempit enggau pangan diri laban enti enda sida deka meri penguntung ngagai penyakal.

“Dalam penegap kaul BN ke bendar, semua orang enda ngira ari ni bagi parti komponen sida, sekalika nya ari PBB, SUPP, SPDP tauka PRS enti orang ke bediri nya chalun BN, rayat aruh meri sukung ke enda begilik,” ku iya.

Berebak enggau tu, nyema parti iya, (PRS) agi milih iya nyadi chalun, iya enda nulak meri servis ngagai mensia mayuh , nambahka nya mega iya ngarapka semua parti komponen deka beembing bau ngambika bulih pemujur ungkup BN.

Sekeda ke bisi datai ngulu pengerami nya chairman pengatur, Tuai Rumah Barak engau Sylvester Embuas ti mega seiku pemesai JASA ungkup P.209 Julau, pengari DO Pakan, Tuan Kunsil Jalin.