Enda ibuh diumbuk, ku Jerip

 by Rengenyan Labang. Posted on February 8, 2012, Wednesday

Anang ngasuh orang saru, kami nadai ningkilka diri ari parti

 KUCHING: Raban kami (Dato Sri Wong Soon Koh) enda kala ningkilka diri ari Parti Sa’ati Rayat Sarawak (SUPP), lalu nadai kebuah diumbuk pulai baru.

Pekara nya diterangka Kaban Kunsil Nengeri (ADUN) Bengoh Dr Jerip Susil, seiku ari raban Wong, lebuh dikerandau pengarang berita kemari.

“Enda ibuh ngumbuk kami pulai, laban kami enda kala ningkil diri ari parti.

“Sida (raban Datuk Peter Chin) patut badu  ngasuh orang saru, laban kitai deka negapka penyerakup. Kami enda kala betalatka sapa tuai, tang kami semina deka penerang ari Opis Pengerejister Gerempung nentuka penanggul ke bisi nyadi, nya aja,” ku Dr. Jerip nyaut lebuh ditanya bekaul enggau sida ti dikumbai ningkilka diri ari parti nya.

Iya dikerandau lebuh ke datai ngulu pengerami nyuaka surat pala tanah Genturung Pendiau Asal enggau Betanam Betupi, di dewan Genturung Pendiau Skuduk, urung 38 Kilometer ari mengeri Kuching ditu, pagi kemari.

Lebuh nandu baru iya madah, sida (raban Peter) patut ngembuan tanggung pengawa ngaga penerang ti dipansutka sida nya, lebih agi pengawa bepilih besai (PRU-13) ke majak semak sereta deka diatur sebarang maya.

“Sida enda tau enda ngembuan tanggung pengawa ngaga penerang ti dipansutka sida, laban kami enda kala ningkilka diri ari parti.

“Nya alai anang ngena awak tu mechakka parti, laban kita deka nyerakup sereta nentuka semua bejalai enggau nadai penanggul sereta nitihka atur ke patut kena ngetanka parti.