Perintah nadai ngerampas tanah rayat

Posted on February 3, 2012, Friday

KENA ENGGAU MANAH: Rohani (dua kiba) benung nyuaka chek pampas tanah ngagai seiku penerima seraya diperatika Simoi (kiba), Mohamad Razali (belakang Rohani) enggau raban ke bukai.

Tanah dikena ngaga jalai, sekula enggau pemansang bukai kelimpah dibayar pampas

SRI AMAN: Sapit Menteri Dagang Dalam Nengeri, Gerempung Kerejasama enggau Pekara Bebeli Barang Malaysia Datuk Rohani Karim madah, perintah nadai hak ngerampas tanah rayat nengeri tu, tang tanah nya dikena perintah bejalaika pemansang.

Ku iya, penemu ti madahka perintah ngambi tanah rayat enggau nadai madah, nya pekara ti enda betul.

“Tanah rayat dikena perintah ngaga jalai alun, sekula enggau pemansang bukai. Kitai ngarapka pekara nya enda diselingkutka sengapa.

Tambah mega nadai jaku ti madahka perintah ngambi tanah rayat enggau nadai pemedar,” ku iya.

Rohani nyuaka chek pampas tanah ngagai 140 iku enggau penyampau RM370,912.86, ti mungkur Projek Perambu Jalai Stumbin Link Baru, Sri Aman, Projek Ngemanahka Jalai Sri Aman/Sembau/Stumbin/Lingga, Sri Aman, Projek Ngemanahka Jalan Stumbin/Tanjung Bijat/Stirau, Sri Aman, Projek Pra-Sekula Genturung Pendiau Sapak, Pantu, Sri Aman enggau Taman Negara Maludam, Betong.

Ngenang pengawa meri Bantu Rayat 1Malaysia (BR1M), iya ngelalau orang ti minta BR1M ke nerima pemutus ‘Peminta Enda Diterima’ patut ngapil peminta baru, sebedau 10 Februari tu.

Ku iya, pom ngapil tau diambi ari Opis Pengumpul Chukai Dalam Nengeri (LHDN) lalu dianjung baru ngagai opis (LHDN) ti semak enggau pendiau.

“Perintah enggai ngasuh rayat berasai lebu ketegal peminta enda dikemendar, tang tau ngisi pom ngapil sebedau 10 Februari tu.

“Rayat ti bedau kala ngisi pom bantu nya laban laun nemu, mega patut ngisi pom nya enggau naka pengelengkas,” ku iya.

Iya ti nyadi Kaban Parlimen (MP) Batang Lupar bejaku ba pengerami nyuaka chek enggau surat pala tanah, ti diatur Opis Tanah enggau Survei (JTS) Bagi Menua Sri Aman ba Bilik Serbaguna, Dewan Suarah ditu kemari.

Ku iya, diatu 70 persin rayat ti udah nemu peminta sida enda bulih tang udah ngapil, lalu diatu udah dikemendarka nerima bantu.

Bisi datai ba pengerami nya, Kaban Kunsil Nengeri (ADUN) Lingga Simoi Peri, Sapit Residen Bagi Menua Sri Aman Hamzen Atar, Injinia Opis Kereja Raya (JKR) Sri Aman Cassidy Moris, Pemesai JTS Sri Aman enggau Betong, Mohamad Razali Arshad enggau Anthony Aboi sereta Temenggong Abang Bohari Abang Zen.