Nadai kebuah ‘nikal’, kami sigi kaban parti

by Judan Bungap. Posted on February 8, 2012, Wednesday

Soon Koh madah sida semina ukai pemesai ba indu opis tang mengkang ba pampang parti

SIBU: Peminta Datuk Seri Peter Chin Fah Kui ti ngarapka raban betuaika Dato Sri Wong Soon Koh pulai baru tauka ‘nikal’ ngagai Parti Sa’ati Rayat Sarawak (SUPP) dipeda jaku ti enda patut dipansutka.

Ku Wong ke nyadi Kaban Kunsil Nengeri (ADUN) Bawang Assan, raban sida apin kala ngelengka parti SUPP lalu sida agi mengkang kaban parti nya.

“Nyangka kami ukai pemesai ari indu opis tang kami agi nyadi pemesai parti ba renggat pampang.

“Jaku Chin ti ngasuh kami mulaika diri ngagai SUPP nya endang enda patut,” pia ku iya madah maya aum media ditu, lemai kemari.

Wong mantaika jaku nya lebuh dipinta nimbal jaku Chin ke dipansut ba surat berita Cina.

Iya ke mega Chairman SUPP Sibu madahka, Chin patut mantaika pekara ti bendar senentang iya empu bekaul isu parti nya, apin tau mantaika jaku ngasuh raban iya pulai baru ngagai SUPP.

“Kami minta amat iya badu mantaika jaku nya agi. Jaku iya nya bechiping bendar ngagai kami.

“Raban kami agi raban parti enggau pemesai parti ba renggat pampang parti. Kami semina enda ngenataika diri ngagai Aum Kereja Parti (CWC) laban enggai bela dibungkur enggau penyalah maya pengawa bepilih renggat pampang parti apin tu tadi,” ku iya nerangka.

Wong ti mega Menteri Wang II madah, enti Chin bangat lurus ati deka ngasuh raban sida pulai baru ngagai parti nya, iya patut dulu nerang pekara ti bendar bekaul enggau bisi penyelai maya pengawa bepilih renggat pampang parti lebih agi ba pampang Pending enggau Sarikei.

Ba pengawa bepilih pampang Pending, ku iya madah keretas undi semina digaga ba jaku Mandarin lalu ba Sarikei, kutak undi disimpan ba rumah panjai tang ukai ba opis pampang parti.

“Enti Chin lurus ati, iya patut nerangka nama kebuah pekara nya nyadi. Betul tauka salah. Iya patut ngasuh kami pechaya sebedau Opis Pengerijister Gerempung (ROS) ngaga pemutus,” ku iya madah pengawa ngaga keretas undi ba jaku Mandrin di pampang Pending baka ke enda ngira bansa Bumiputera ke bukai.

Jaku Chin ba surat berita Cina nya mega baka ke madah raban ti betuaika iya (Wong) ngasuh parti sida pambar.

Maya ditanya deka ke enda raban ti betuaika iya bekerejasama enggau Chin ba pengawa bepilih ti deka datai, ku Wong, nama pekara ke nyadi ba Sibu aruh diserah ngagai iya magang.

“Iya nyangka semina ulih mantu ba Miri aja lalu aku ba Sibu. Taja pan baka nya kitai bekenaka orang mantu ba Kuching,” pia ku iya sambil madah chalun ke dipilih ila bepelasarka pemutus ari Menteri Besai (PM) enggau Kepala Menteri (KM).

Enggau tu mega iya madah SUPP ulih ngambi baru penuduk Parlimen Sibu ari penyakal lalu ngetanka penuduk Parlimen Lanang.