SURAT PALA TANAH: Adenan (kanan) nyuaka surat pala tanah ngagai seiku ari penerima ba Genturung Pendiau Skuduk, ke bela dikemataka Manyin, Sagah enggau Nansian.
KUCHING: Bansa Bumiputera ke bukai ba nengeri tu patut bechuntoka raban bansa Bidayuh, ba kaul meri kerejasama enggau sukung pengawa nyukat kelingi tanah sida.
Menteri ba Opis Kepala Menteri (Pengawa Engkeman) Tan Sri Adenan Satem madah, laban ari kerejasama raban bansa, udah ngemuntang sereta ngenyampatka Opis Tanah enggau Survei (JTS) bejalaika pengawa.
Iya madah, mensia mayuh ti enda nyukung pengawa nyukat kelingi, deka ditinggalka.
“Orang Iban, Orang Ulu, Melayu enggau semua bansa Bumiputera ke bukai patut bechuntoka raban bansa Bidayuh ti besetuju sereta nyukung pengawa nyukat tanah ke dipejalaika JTS.
“Ari penyerakup enggau sukung, semua penanggul muntang diputarka.
“Aku udah madah ngagai JTS ngambi ngelaungka orang ti mantah sereta bisi penanggul lebuh pengawa nyukat kelinggi dipejalaika,” ku iya ti muji raban bansa Bidayuh ti nyukung pengawa nyukat tanah lot, lalu ngujungka pengawa nyukat nadai penanggul.
Adenan bejaku ba pengerami nyuaka surat pala tanah ngagai mensia mayuh ba Genturung Pendiau Asal enggau Betanam Betupi, Genturung Pendiau Skuduk, ke diatur ba Balai mensia Mayuh Genturung pendiau Skuduk, ditu kemari, urung 38 kilometer penyauh ari mengeri Kuching.
Penyampau lot tanah iya nya bisi 327 ti nyerangkung Genturung Pendiau Asal (119 lot) enggau Lot Betanam Betupi (308 lot).
Berebak enggau nya mega iya muji inisiatif Dayak Bidayuh National Association (DBNA) ti dulu ngerandang iya nya nyukat ngena kereban GPS sebedau dianjung sereta disahka JTS.
Nambahka nya iya mega ngelalau mensia mayuh ngambika enda mudah achuk sekeda orang ti semina bejaku aja, tang nadai ngereja pengawa.
Semina JTS sereta menteri aja ti ngemendarka tanah disukat, disah sereta surat pala tanah dikeluarka, ku iya.
“Kelimpah ari JTS enggau menteri ti bekaul, orang bukai nadai ulih nyukat tanah sereta ngeluarka pala tanah. Enti nyema bisi pan, nya orang ti deka ngachuk aja,lalu anang ningaka sida.
Nitihka penerang Adenan, bulan Mac ke deka datai iya deka ngemendarka pengawa nyukat ngagai genturung pendiau Bidayuh ke bukai.
Lebuh dikerandau pengudah pengerami nya kemari, Adenan madah, 18 bengkah genturung pendiau raban bansa Bidayuh deka disukat dalam taun tu.
“JTS deka nyendiaka surat pala tanah nya dalam kandang 30 hari, kitai deka ngatur pekara nya enggau naka pemanah, ngambika ulih dikereja enggau jampat, lalu dipejalaika dalam taun tu,” ku iya.
Dulu ari nya, Menteri Pemansng Infrastruktur enggau Penyambung, Dato Sri Michael Manyin Jawong madahka 18 bengkah genturung pendiau Bidayuh disukat sereta nerima surat pala tanah, baka ke udah dikereja ba Genturung Pendiau Skuduk.
“DBNA udah tembu ngaga dokumen ke 18 bengkah gentutng pendiau ke bukai, lalu deka disua ngagai JTS ngambi disahka,” ku iya lebuh bejaku ba pengerami nya.
Bala pemesai ke bisi datai ngulu pengerami nya Menteri Muda Betanam Betupi ti mega Menteri Muda Perengka Guna Mensia Mayuh, Datuk Sylvester Entrie Muran; Menteri Muda Tanggung Pengawa Raban Bansa ti mega Menteri Muda Pemansang Industri, Datuk Peter Nansian Ngusie; Menteri Muda Pengerai Mensia Mayuh, Dr Jerip Susil, Penguasa Tanah enggau Survei Pelilih Kuching Taib Belal, Sapit Speakar Datuk Roland Sagah sereta pemesai raban bansa Bidayuh ke bukai.
No comments:
Post a Comment