‘BN Dipilih Rayat’ sigi mai pemansang

Posted on February 8, 2012, Wednesday

TURUN PADANG: Nanta benung berandu enggau sekeda penerima
BR1M ke mujur nerima baucher ke diatur di SK Nanga Yong, apin lama tu tadi.

Mayuh macham polisi enggau progrem udah diperambu ungkup pengelantang rayat

KAPIT: Kaban Parlimen (MP) Kapit Datuk Alexander Nanta Linggi madahka ‘Barisan Nasional (BN) Dipilih Rayat’ ti meri reti pengari rayat BN nyadika ‘jematan’ entara perintah enggau rayat.

“Kami, (pengari rayat BN) bejalaika tanggung pengawa ke berat ngarika rayat. Kami aruh ngerahka pemansang ke dipejalaika perintah bepelasarka polisi enggau progrem ti ulih meri penguntung ngagai rayat,” ku iya.

Iya madahka perintah sigi merambu mayuh macham progrem enggau polisi ti nguntungka mensia mayuh.

“Tang taja pia, bisi sekeda raban (penyakal) beambi ulih ari pekara nya, iya nya nguji deka bejaika perintah amat meh rayat nemu pemanah perintah ti ngemeratka pengelantang pendiau pengidup enggau pengelikun menua,” ku tandu iya.

Nitihku Nanta, BN udah mayuh mantu rayat kena napi rega barang ke majak mar iya nya baka Bantu Rayat 1Malaysia (BR1M), e-perumahan, 1 AZAM TANI, duit bantu sekula RM100 enggau utai bukai.

Ambika chunto, perintah udah ngagihka BR1M ngagai raban ke mujur kena mantu sida ke kurang penatai pemisi baruh RM3,000 sebulan.

Nyerumba enggau nya, iya ngelalau raban orang ke enda bulih peminta nya, ulih minta baru enggau jampat.

Iya bejaku munyi nya lebuh bejadika pengerami Nyuaka BRIM RM 500 ungkup sitak Sungai Yong ke diatur Opis Kunsil Pelilih Menua Kapit ba SK Nanga Yong kenaka Hari Satu tu tadi.

Sama bisi datai ba pengerami nya Sekretari Politik Kepala Menteri Tengku Gruna, Pemesai Pelilih Kapit Elvis Didit, Kepala Pengajar SK Nanga Yong Isahak enggau tuai raban bansa ke bukai.