Mawan: SPDP udah ngirai chalun ungkup Mas Gading

Posted on February 6, 2012, Monday

UNGKUP KITA: Mawan (lima kanan) nyuaka chek ngagai Jonas 

seraya diperati bala bukai ba Sibu ditu, kilah ensanus.

SIBU: Parti Demokratik Progresif Sarawak (SPDP) udah nyediaka diri napi Pengawa Bepilih Besai (PRU) ti deka datai.

Presiden parti tu, Tan Sri William Mawan Ikom madahka, sida udah nyikap diri nengah pengawa suah agi nurun betemu enggau mensia mayuh ngambika pengari rayat parti tu ulih mutar sereta mendingka penusah ti bisi nuntung rayat ba sitak Parlimen diri empu.

“Ke bendar iya, SPDP endang udah lama udah nyendiaka diri nya alai pengari rayat SPDP bejalaika pengawa nitika pelin parti tu.

“Enggau chara tu, SPPD andal amat ati ulih menang ba semua penuduk parti kami nyengkaum ba Parlimen Mas Gading,” pia ku iya madah nggai pengarang berita, kilah ensanus.

Apin nya, Mawan iya ke mega Menteri Pemansang Rama nyerahka chek RM10,000 ngagai Serakup Opis Kunsil Menua Pesisir Sibu (MDLBS) ti disambut sapit presiden serakup tu Jonas Rayih ba sebengkah hotel tebilang ditu.

Ku Mawan nandu jaku iya baru, taja pan penuduk Mas Gading apin nentuka chalun bediri dia tang Parlimen nya siti ari penuduk kuat Barisan Nasional.

“Naka ke diatu rayat ba penuduk nya endang nyebut Datuk Dr Tiki Lafe chalun sida laban SPDP apin nentuka chalun dia,” ku iya sambil madahka Dr Tiki agi nyadi pemangku penuduk nya.

Maya ditanya sapa chalun ti deka nganti Dr Tiki, ku Mawan, SPDP udah bisi enam ngagai tujuh iku chalun ulih nganti penuduk iya.

“Diatu SPDP benung beratika sapa bagi chalun ba penuduk nya.

“Taja pan baka nya, tu enda mandangka aku mulih chalun nitihka peneka ati tang bepelasarka jaku ari semua raban SPDP nyengkaum rayat ba Parlimen nya empu.

“Chalun ke dipilih nya ila endang engkeman laban bekiraka peneka rayat menua nya empu. Aku deka mantaika nama sapa patut nyadi chalun dia ila,” pia ku iya madahka baru.

Bisi datai maya tu mega iya nya Seketari Politik Kepala Menteri Howell Jilan, Chairma MDLBS James Laju Ambok enggau Chairman SPDS Zon Tengah Kunsilor Tiong Yong Hing.