Posted on March 15, 2012, Thursday
KUCHING: Chairman Parti Keadilan Rakyat (PKR) Sarawak Baru Bian ensanus madah, rayat ke ngiga penyakal ngambika mantu sida ngirit perintah ngagai kot.
“Kami nadai ngiga sida tu tang ke bereraban datai sida ke ngiga kami. Ke bendar, ba mayuh bengkah pengerami aku madah ngagai sida ke diau ba rumah panjai, aku kelalu kiruh enggau kes NCR, nya alai enti ulih sida ngiga luyar bukai tang sida madah enda ulih,” ku Baru, ke nyadi luyar NCR, ba penerang iya ensanus.
Nya meh isu dikena iya nimbal Sapit Menteri Dagang Temuai Datuk Dr James Dawos Mamit ti madahka penyakal teperansang ketegal duit lebuh ti ngirit perintah ngagai kot.
Dawos, ke mega Kaban Parlimen Mambong, bejaku munyi nya ba pengerami makai lemai ba Tapah, enda jauh ari Kuching, kena lemai Hari Lima seraya madahka tebal agi bala penyakal nya luyar lalu penatai pemisi sida datai nengah peminta ngagai kot.
Dawos mega madahka bala luyar ngagai menua pesisir sereta nyadung penerang ke salah senentang chara perintah ngachau ungkup sida sereta lalu mujuk sida mai pekara nya ngagai kot. “Sida deka ngulihka upah. Nya meh chara sida ngidupka diri. Aku nemu chara sida,” ku iya.
Ba penemu Baru ke mega pengari rayat Ba’ Kelalan, penerang ke dipansutka Dawos nya mandangka komponen Barisan Nasional bebendar deka ngetanka kuasa sida.
No comments:
Post a Comment