Posted on January 26, 2012, Thursday
KUCHING: Speaker Kunsil Nengeri (DUN) Datuk Roland Sagah Wee Inn ngutuk pengawa gerempung enggau ketuai genturung pendiau ti enda ngerembaika pasal pemeri geran Projek Pemansang Mit Menua Pesisir (MRP) ngagai mensia mayuh ke dipegai sida.
Ku iya, bisi seiku dua ketuai genturung pendiau enggau gerempung dipelabaka sengaja enda madah pekara nya ngagai mensia mayuh ba genturung pendiau sida.
Pengawa ti baka nya ku iya ulih ngenyai imej perintah Barisan Nasional (BN), ti tau meri peluang ngagai penyakal bejaika perintah.
“Pengawa seiku tauka dua ketuai genturung pendiau enggau ketuai gerempung ti enda madah ngagai mensia mayuh pasal geran MRP ari perintah, amat ngenusahka ati, laban nya tau meri sangka ti enda manah pasal BN.
“Ulah baka tu tau ngujungka mensia mayuh ba genturung pendiau tauka kaban gerempung ngumbai perintah enda kala nulung rayat lalu pengujung iya BN dipesalahka,” ku iya mega madah nya ukai semina ngenyaika nama pengari rayat ba sitak tang mega BN.
Ari nya Sagah ke mega Kaban Kunsil Nengeri (ADUN) sitak Tarat minta pengawa ti baka nya diketuka.
Iya bejaku ba pengerami nyuaka geran MRP sepenyampau RM310,000 ngagai 32 penerima ti ngarika gerempung enggau genturung pendiau dalam sitak Tarat enggau aum Parti Pesaka Bumiputera Bersatu (PBB) pampang Tarat ba Tapah, ditu, ensana.
Sagah madahka pekara nya kala nyadi ba iya, maya iya dilawa seiku orang ti madah diri enda kala nerima geran MRP.
Taja pia iya gaga ati enggau ulah manah ketuai genturung pendiau sereta ketuai gerempung ti madahka pasal pemeri geran nya ngagai mensia mayuh sereta ngagai gerempung sida.
“Kelimpah ari nya, chara melanja geran MRP mesti tampak ngambika geran nya dikena enggau tuju ti manah, taja pan penyampau enda mayuh, tang pemeri nya besai amat reti.
Bisi enggau ngulu pengerami nya Exco Pemuda PBB ti mega Ketuai Pemuda PBB Tarat Stanley Sila ti madah injin pengawa bepilih PBB ba pampang nya udah besedia napi pengawa bepilih ti deka datai tu.
No comments:
Post a Comment