Posted on January 26, 2012, Thursday
KUCHING: Presiden Parti Demokratik Progresif Sarawak (SPDP) Tan sri William Mawan enggai ngenang pasal pengawa ngulurka papan pal parti nya, Hari Enam tu tadi.
Ku iya nerang, kebuah iya enggai komen laban talukka bala pemesai parti Barisan Nasional (BN). “Aku enda ulih komen pasal pekara nya, laban nitihka jaku (bala ketuai),” ku iya lebuh dikerandau ba rumah tebuka Ketuai Raban Bansa China Datuk Sim Swee Yong ba pengerami Taun Baru China, ditu, Hari Satu tu tadi.
Surat kabar menua tu kena Hari Minggu tu tadi bisi ngeriput, urung 1,000 iku penyukung BN ari sitak Mas Gading enggau Tasik Biru datai meri sukung ngagai pengari rayat ba kededua bengkah sitak nya ba pengerami ngantung papan pal ke baru, ‘Pusat Khidmat BN’.
Papan pal nya ditukar pengudah dua iku pengari rayat nya, Datuk Peter Nansian Ngusie (ADUN Tasik Biru) enggau Datuk Dr Tiki Lafe (Kaban Parlimen Mas Gading) ditingkil ari SPDP.
Nambahka raban nya, ADUN Marudi Datuk Sylvester Enteri, ADUN Bekenu Rosey Yunus enggau ADUN Batu Danau Paulus Paulu Ngumbang bela napi pemutus ke sebaka ketegal enda nitihka atur parti.
Nansian, ti bejaku ngarika sida, taja pen sida mengkang nyadi pengari rayat BN taja dibuai ari parti apin lama.
Ku iya, sida numbuhka Kelab BN ke pelasar ngambika ulih terus gawa ke rayat nengah BN sereta ukai ari parti SPDP.
No comments:
Post a Comment